දැනටමත් 11 දෙනකු දිවි නසාගෙන

යහපාලනයට මුවා වී කොතලාවල බොරු කියනවා
දැනටමත් 11 දෙනකු දිවි නසාගෙන
ගෝල්ඩන් කී තැන්පත්කරුවන්ගේ සංගමයේ සභාපතිනිය

ගෝල්ඩන් කී තැන්පත්කරුවන්ගේ සංගමයේ සභාපතිනි දුෂ්‍යන්ති හපුගොඩ මහත්මිය මාධ්‍යයට කරුණු දැක්‌වූ අයුරු. ඡායාරූපය - ධර්මසේන වැලිපිටිය

සිරිමන්ත රත්නසේකර

ගෝල්ඩන් කී තැන්පත්කරුවන් නමදහස්‌ එකසිය විසිහත් දෙනාගෙන් එකොළොස්‌ දෙනකු මේ වන විට සියදිවි නසාගෙන ඇති බවත්, තවත් එකසිය එකොළොස්‌ දෙනකු අකාලයේ මියෑදී ඇති බවත් ගෝල්ඩන් කී තැන්පත්කරුවන්ගේ සංගමයේ සභාපති දුෂ්‍යන්ති හපුගොඩ මහත්මිය ඊයේ (20 වැනිදා) අනාවරණය කළාය. එහෙයින් තවත් තැන්පත්කරුවන් අකාලයේ මරු තුරුළට නොයවා නීතියේ සාධාරණත්වය ඔවුන් වෙනුවෙන් ඉටු කරන මෙන් අදාළ අංශවලින් ඉල්ලා සිටින බවද ඇය කීවාය.

ගෝල්ඩන් කී තැන්පත්කරුවන්ගේ මුදල් ගෙවීම වෙනුවෙන් 2013 වසරේÊපෙබරවාරි 04 වැනිදා ශ්‍රේෂ්ඨාධිකරණය අනුමත කළ සැලසුම කල් නොයවා වහා ක්‍රියාත්මක කිරීමට කටයුතු කරන ලෙසත් හපුආරච්චි මහත්මිය ඉල්ලා සිටියාය.

සෙලින්කෝ සමූහ ව්‍යාපාරයේ සභාපතිව සිටි ලලිත් කොතලාවල මහතා යහ පාලනයට මුවාවී මෙම මූල්‍ය වංචාවෙන් ගැලවී සිටීමට උත්සාහ කරන බවටත් ඔහු දැන් මාධ්‍ය මගින් අමූලික බොරු ප්‍රකාශ කරමින් සිටින බවටත් ඇය චෝදනා කළාය.

මෙම තැන්පත්කරුවන් වෙනුවෙන් ගොනුකළ මූලික අයිතිවාසිකම් නඩුව වරින් වර පත්ව සිටි අග්‍ර විනිශ්චයකාරවරුන් සිව්දෙනකු සහ ශ්‍රේෂ්ඨාධිකරණ විනිසුරුවරුන් 14 දෙනකු යටතේ විභාග වුවත් මේ වන තෙක්‌ විසඳුමක්‌ ලැබී නොමැති බවත් කී හපුගොඩ මහත්මිය මෙය දීර්ඝ කාලයක්‌ විභාගවන මූලික අයිතිවාසිකම් නඩුව ලෙස ගිනස්‌ වාර්තාවක්‌ තබා ඇතැයිද කියා සිටියාය.

තැන්පත්කරුවන්ට මුදල් හොයා ගන්නේ කෙසේද යන්න නොව තැන්පත්කරුවන්ගේ මුදල්වලට ලලිත් කොතලාවල මහතා කුමක්‌ කළේද යන්න විමර්ශනය කිරීම සඳහා ජනාධිපති කොමිසමක්‌ පත්කළ යුතුව ඇතැයිද ඇය පැවසුවාය.

නාරාහේන්පිට රේණුකා හෝටලයේ දී ඊයේ (20 වැනිදා) පැවැති මාධ්‍ය හමුවකදී ගෝල්ඩන් කී තැන්පත්කරුවන්ගේ සංගමයේ සභාපතිනි දුෂ්‍යන්ති හපුගොඩ මහත්මිය එම අදහස්‌ පළ කළාය.

මෙම මාධ්‍ය හමුව සඳහා තැන්පත්කරුවන් කිහිප දෙනකුද එක්‌වූ අතර එහිදී ඇතැම් තැන්පත්කරුවෝ හැඬූ කඳුළින් සිය අදහස්‌ ඉදිරිපත් කළහ.